Danksy bydraes van spoorwegpersoneel  reg oor die land  het Ysterwiele 1  triomfantlik uitgerol op  spore van herinnerings  en dit moontlik gemaak dat Ysterwiele 2 vandag in haar sleep kan volg.   Dit is so dat  mense oor die  hele wêreld heen  hul talente  gee vir ander  om te geniet, hetsy deur musiek,  rolprente, opvoerings, teater ens.   Vir daardie selfde doel  het  hierdie professionele spoorwegmense,  wat die pad van teoretiese opleiding geloop en   geweek is in die praktiese sy daarvan,   kosbare skatte uit hul juweelkissies van  spoorweg- herinneringe gehaal   om  deur hierdie kollektiewe terugblik   iets te gee van hulself as spoorwegwerkers  ter aanvulling van die genot van lekkerlees. 

Hulle  hele bestaan   het om hul liefde vir die  ystermonsters gedraai  en   hierdie wêreld van hulle was  nie een vir die luiaard nie.  Deur middel van  hierdie terugblik  kan ons in ons verbeelding hul lewensgang volg tot by  die  jare toe spoorweg sy beslag gevind het in Suid Afrika.  So ook kan hulle vandag vanaf hul eindpale  terugkyk na by die jare waarin hulle as spoorwegwerkers begin het.